Sa aking paglalakbay ako'y napadpad sa kaharian ng Librero. Kabigha-bighani ang kaharian at maraming yaman ang matutuklasan na magbibigay pag-asa at kulay sa mga mamamayan dito.Ngunit sa kasawiang palad ang kaharian ay pinamumunuan ng isang haring bugnutin (mabibilang mo sa mga daliri mo sa kamay kung ilan beses lamang siya ngumiti sa buong maghapon), makasarili, mapang-hamak at walang tiwala sa kapwa.
Isang araw pinulong niya ang kanyang mga delegado para sa isang proyekto sa palasyo. Ito ang kanyang sinabi ipinatawag ko kayo para sa isang proyekto kaya mag-isip naman kayo ng mga ideya, lagi na lamang ako ang nag-iisip, matanda na ako at ayoko ko ng mag-isip. Nang magbigay ng ideya ang mga delegado ito ang kanyang sinabi napakababaw ng mga ideya ninyo! Kaya't tapusin na natin ang pagpupulong na ito, ako na lang ang mag-iisip ipapatawag ko na lang kayo muli para ipahayag ang aking mga ideya.
Dumating na ang araw ng pagpapahayag ng hari. Sa kanyang mayabang na pagpapahayag ng kanyang mga ideya ay para siyang isang lata na walang laman. Sapagkat ang mga ideya kanyang binanggit ay galing lamang sa kanyang mga delegado noong unang pagpupulong. Ganoon pa man malugod siyang pinakinggan ng kanyang mga delegado at dahil doon nagtagumpay ang kanilang proyekto sa palasyo.
Isang araw nagkaroon ng piging sa palasyo. Sa piging walang ginawa ang hari kundi hamakin ang lahat ng mga bisita, para bang hindi sanay kumain na masasarap na pagkain ang mga tao dumalo sa piging. Mula ulo hanggang paa kung pagmasdan niya ang kanyang mga bisita katulad din siya ng dalawang magkaibigang bulag na tumitingin lamang sa panlabas na kaanyuan at mas malungkot pa siya sa ermitanyo sa dako paroon sapagkat hindi lamang sarili niya ang nilalagay niya sa kahon kundi pati mga tao sa paligid. Sayang at hindi niya nakikita ang iba't-ibang katangian ng kanyang mga mamamayan na tunay na nagbibigay kulay at ganda sa kanyang palasyo. Dahil sa mga pangyayari aking nabatid na ang hari ay nangangailangan ng tubig mula sa balon ng pag-ibig. Ang tubig mula sa balon ng pag-ibig ang gigising sa natutulog na kaisipan ng hari, ang magpapalambot sa batong puso niya at magmumulat sa kanyang mga mata upang makita niya na ang tunay na kayamanan ay nasa tamang pag-uugali, tamang pagmamahal at tamang paggamit ng karunungan na ipinagkaloob sa atin ng Maykapal.
No comments:
Post a Comment